Чӑваш Енре QR-кодсене пула референдум ирттересшӗн. Пуҫаруллӑ ушкӑн республикӑри Тӗп суйлав комиссине ҫыру янӑ.
Референдумра халӑха QR-код кирлипе кирлӗ марри ҫинчен ыйтса пӗлесшӗн. Референдум иртӗ-и е ҫук-и – хальлӗхе паллӑ мар. Ку ҫырӑва 15 кун хушшинче пӑхса тухӗҫ. Комисси ирӗк парсан ыйтӑва ЧР Патшалӑх Канашӗ пӑхса тухӗ.
Аса илтерер: юпа уйӑхӗнче чылай учреждение QR-кодпа кӗртме тытӑннӑ.
Чӑваш Енӗн Патшалӑх Канашӗн депутачӗ Олег Дельман хӑй ертсе пыракан «Чебоксарский промстройпроект» проект институчӗн ӗҫченӗсене шалу вӑхӑтра тӳлеменнине, парӑм виҫи 1 миллион тенке яхӑн пухӑнса кайнине тупса палӑртнӑ.
Организацире тӗрӗслеве прокуратура пӗтӗрхи ҫӗртме уйӑхӗнче ирттернӗ. Ҫавӑн чухне институтра ака-ҫу уйӑхӗсемшӗн шалу парӑмӗ пуррине асӑрханӑ. Тӗрӗслев хыҫҫӑн административлӑ ӗҫ пуҫарса организацие тата ертӳҫӗне явап тыттарнӑ. Кӑҫалхи нарӑс уйӑхӗнче прокуратурӑна шалу пирки ушкӑнпа евитленӗ. Айӑплисене каллех явап тыттарнӑ. Ака уйӑхӗнче надзор органне ҫӑхав тата ҫитнӗ.
Хальхи вӑхӑта илсен, ҫурла уйӑхӗнчен авӑн уйӑхӗччен институтри 23 ӗҫчен умӗнче парӑм виҫи 1 миллиона яхӑн тенкӗ парӑм пухӑнса кайнӑ. Прокуратура хушша-хуппа кӗнӗ хыҫҫӑн парӑма тӳлесе татнӑ. палӑртнӑ тӑрӑх
Ҫитес ҫул пуҫламӑшӗнче йӑлана кӗнӗ тӑрӑх ЧР Элтеперӗ Олег Николаев Патшалӑх Канашне Ҫырупа тухӗ. Ҫавна май Олег Алексеевич ун валли сӗнӳсем пухма тытӑннӑ.
Ҫырӑва вӑл кӑрлач вӗҫӗнче е нарӑс пуҫламӑшӗнче вулӗ. Унччен ҫынсем Патшалӑх Канашне ямалли Ҫыру валли сӗнӳсем пама пултараҫҫӗ. Вӗсене poslanie@cap.ru электронлӑ почтӑна «Ҫыру валли – 2022» тесе палӑртса ямалла.
Аса илтерер: Олег Николаев пӗрремӗш Ҫырӑвне пӗлтӗр нарӑс уйӑхӗн 2-мӗшӗнче Оперӑпа балет театрӗнче вуланӑ.
Виҫӗмкун Чӑваш Енӗн Патшалӑх Канашӗн ҫӗнӗ созыври депутачӗсем иккӗмӗш сессие пуҫтарӑннӑ. Ӑна ҫак йӗркесен авторӗ итлемен-ха, анчах Андрей Иванов журналист пӗлтерни тӑрӑх хакласан, сесси лӑпкӑ иртнӗ, ҫапах та кулӑшларах самантсем тупӑннӑ.
Игорь Моляков депутат, сӑмахран, Петр Краснов депутатран (сӑнӳкерчӗкре сылтӑмри) кӗтмен ҫӗртен ҫапларах ыйтнӑ: «Петр Степанович, эпӗ сире итлетӗп те ӑнланмастӑп: эсир Олега Алексеевича Николаева пӗрмаях хисеплӗ тетӗр, Леонида Ильича Черкесова – хаклӑ. Мӗншӗн ҫавӑн пек?»
Чӑваш патшалӑх гуманитари ӑслӑлӑхӗсен институчӗн директорӗ епле хуравланине, шел те, пӗлместпӗр. Ҫав вӑхӑтра сессин онлайн-трансляцийӗ чӑхӑмласа илнӗ.
Ӗнер Чӑваш Енре Патшалӑх Канашӗн иккӗмӗш ларӑвӗ иртнӗ. Унти ытти ыйтупа пӗрлех миравай судья пулмалли ҫынсен кандидатурисене пӑхса тухнӑ. Малашне вӗсене унчченхи пек палӑртнӑ вӑхӑтлӑха ҫирӗплетмӗҫ. Миравай судьясем йӗркеллӗ ӗҫлесен е урӑх ҫӗре куҫас темесен тахҫанчченех тӑрӑшма пултарӗҫ. Кун пек тума Раҫҫей шайӗнче йышӑннӑ.
Республикӑн Патшлӑх Канашӗн ларӑвӗнче ӗнер Шупашкарти Мускав районӗн 6-мӗш суд участокӗн миравай судйи пулма Татьяна Антиповӑна ҫирӗплетнӗ, Канаш районӗнчи 2-мӗш суд участокӗпе — Алексей Корсакова, Шупашкарти Калинин районӗнчи 6-мӗш суд участокӗпе — Виктория Новиковӑна, Шупашкарти Мускав районӗнчи 7-мӗш суд участокӗпе — Ольга Петровӑна.
Авӑн уйӑхӗн 19-мӗшӗнче эпир тӗрлӗ шайри депутатсене суйларӑмӑр. Чӑваш Енӗн Ҫӗнӗ, ҫиччӗмӗш, созыври депутачӗсем, ав, ҫак эрнере пӗрремӗш ларӑва пухӑнчӗҫ.
Сесси хыҫҫӑн «Правда ПФО» тӗнче тетелӗнчи кӑларӑм кӑсӑклӑ темиҫе пӗтӗмлетӳ тунӑ.
Пӗрремӗшӗнчен, Чӑваш Енӗн парламентӗнче арлӑх енӗпе танмарлӑх хуҫаланать. Ҫӗнӗ созыва суйланнӑ 44 депутатран хӗрарӑмсем 4-ӑн ҫеҫ. Ҫав вӑхӑтрах чи ҫамрӑк депутат – хӗрарӑм. Ку вӑл – 21 ҫулти Ксения Семенова. Чӑваш парламентне вӑл «Ҫӗнӗ ҫынсем» партирен суйланнӑ.
Кӑсӑклӑ тепӗр самант – регионӑн парламенчӗ нумай партиллӗ пулни. Унта 6 парти пайташӗ суйланнӑ.
ЧР Патшалӑх Канашӗнчи коммунистсен икӗ фракци тейӗн. Вӗсенчен пӗрне, пилӗк депутата Шурчанов ертсе пырать теме юрать, тепӗр икӗ депутатран тӑракан йыша – Андреев теме пулать.
Паян, авӑн уйӑхӗн 29-мӗшӗнче, Чӑваш Енӗн ҫиччӗмӗш созыври Патшалӑх Канашӗ хӑйӗн пӗрремӗш ларӑвне пуҫтарӑннӑ. Кун йӗркине кӗртнӗ ыйтусем, тӗпрен илсен, йӗркелӳ саманчӗсемпе ҫыхӑннӑ. Вӗсенчен пӗри – парламент ертӳҫине суйласси. ЧР Патшалӑх Канашӗн Председателӗ пулма Леонид Черкесова шаннӑ.
Леонид Черкесов юлашки ҫулсенче РФ Патшалӑх Думин депутачӗ пулнӑччӗ.
«Пысӑк шанӑҫшӑн сире, хисеплӗ ӗҫтешӗмсем, тав тӑватӑп. Республика парламентне тухӑҫлӑ ӗҫлеттерессишӗн хамӑн мӗнпур пӗлӳпе, опытпа усӑ курӑп», – тенӗ Леонид Черкесов.
Аван уйӑхӗн 27-мӗшӗнче «Пӗрлӗхлӗ Раҫҫей» парти Шупашкар мэрӗ пулнӑ, халӗ РФ Патшалӑх Думин депутатӗнче ӗҫлекен Леонид Черкесова ЧР Патшалӑх Канашӗн председательне лартма сӗннӗ.
Ыран, авӑн уйӑхӗн 29-мӗшӗнче, Патшалӑх Канашӗн ҫиччӗмӗш созывӗн пӗрремӗш сессийӗ пулать. Шӑпах унта председателе, унӑн ҫумне, комитетсен председательне, аппарт ертӳҫине, Чӑваш Ен сенаторне суйлӗҫ. Патшалӑх Канашӗн депутачӗсенчен ытларахӑшӗ, 30-шӗ, - «Пӗрлӗхлӗ Раҫҫей» парти пайташӗсем. Ҫавна май Леонид Черкесовӑн председатель пулас шанчӑк пысӑк.
Ҫавӑн пекех Шутлавпа тӗрӗслев палатин ертӳҫине палӑртӗҫ. Ку пукана Светлана Арисова йышӑнма пултарӗ.
Раҫҫейре, ҫав шутра – Чӑваш Енре те, суйлав ҫывхарса пырать. Ҫав кунччен хваттер илсе пропискӑна улӑштараймарӑр-и? Унашкаллисем валли республикӑра 25 суйлав участокӗ ӗҫлӗ.
Кунашкал участоксенче килсӗр-ҫуртсӑр ҫынсем те сасӑлама пултараҫҫӗ. Ун пек суйлав участокӗсем кашни районта пӗрер пулӗҫ. Шупашкарти виҫӗ районта та ҫавӑн пек участоксен алӑкӗсем уҫӑ пулӗҫ.
Аса илтерер: кӑҫал кӗркунне ЧР Патшалӑх Канашӗн, РФ Патшалӑх Думин суйлавӗ пулӗ. Вӑл авӑн уйӑхӗн 17-19-мӗшӗсенче иртӗ.
Владимир Жириновский ЧР Патшалӑх Канашне суйламнашкӑн кандидат пулса тӑнӑ. Кун пирки «Правда ПФО» сайт пӗлтерет.
Сӑмах май, ЛДПР партин председателӗ Владимир Жириновский унччен Шупашкар хула пухӑвӗн депутатне суйланма кандидат пулнӑччӗ. Хальхинче вӑл Патшалӑх Канашне суйланасшӑн. Ҫитес вӑхӑтра документсем Чӑваш Енри Тӗп суйлав комиссине ҫитӗҫ.
Палӑртмалла: суйлав кӗркунне иртӗ, виҫӗ куна тӑсӑлӗ: авӑнӑн 17-мӗшӗнче пуҫласа 19-мӗшӗнче вӗҫленӗ.
-18.7 °C